Reglur

Þátttakendur

Aldurstakmark í leikjum spilavélanna er 18 ár. Að auki hafa rekstraraðilar veitinga- og spilastaða þar sem spilavélar Gullnámu eru staðsettar oft sett 20 ára aldurstakmark inn á staðina.

Peningaþvætti

Allir vinningshafar þurfa að fylla út áreiðanleikakönnun samkvæmt lögum nr. 140/2018 um aðgerðir gegn peningaþvætti og fjármögnun hryðjuverka.

Happdrætti Háskóla Íslands ber að tilkynna allan grun um peningaþvætti. Sérstakt eftirlit er hjá HHÍ sem skoðar alla spilun í vélum Gullnámu og einnig greiddum vinningum.

Allur grunur um peningaþvætti er tilkynntur til lögreglu í samræmi við lög!

Vinningshafar þurfa að gangast undir áreiðanleikakönnun við greiðslu vinninga. Áreiðanleikakönnun er ferli þar sem upplýsingum um viðskiptavini er safnað og þær metnar til að tryggja að þeir séu löglegir og ekki tengdir ólöglegum athöfnum eins og peningaþvætti eða fjármögnun hryðjuverka. Er þetta gert á grundvelli fyrrgreindra laga.

Útborgun vinninga

Allar inneignir í spilavélum sem og vinningar eru greiddir úr spilavélum með miðum. Alla miða undir 100.000 krónur, nema vinningspotta yfir 50.000 krónur, er hægt að setja aftur í hvaða vél sem er á hvaða spilastað sem er. Vinninga yfir 250.000 krónur, einnig Gullpotta, þarf að innleysa í Happinu (smáforriti HHÍ) eða með framvísun persónuskilríkja hjá gjaldkera Happdrættis Háskóla Íslands og er þá vinningur millifærður inn á bankareikning vinningshafa.

Alla vinninga er hægt að innleysa í Happinu og er það besta og fljótlegasta leiðin. Einnig er það hægt hjá gjaldkera HHÍ eða með framvísun persónuskilríkja í afgreiðslu spilastaða Gullnámu. Gildistími miða er eitt ár.

Gullnáman tekur ekki ábyrgð á týndum, afrituðum eða stolnum miðum. Eigendur miða eru ábyrgir fyrir að sannreyna miðaupplýsingar og tilkynna um villur. Miðar eru ógildir ef þeir eru ólesanlegir, falsaðir eða þeim hefur verið breytt. Einnig ógilda vélabilanir og villur rétt til vinninga.

Ef miði fæst ekki staðfestur í tölvukerfi þá áskilur Gullnáman sér rétt til að fresta einhliða greiðslu vinnings þar til skýring er fengin. Gullnáman áskilur sér rétt til að krefja vinningshafa um endurgreiðslu tvígreiddra eða ofgreiddra vinninga. Þess má geta að vinningsmiða skal leysa innan gildistíma, að öðrum kosti verður vinningur eign HHÍ.

Til þess að fá vinningsmiða greidda þarf vinningshafi að framvísa persónuskilríkjum og vera 18 ára eða eldri.

Allir vinningar í Happdrætti Háskóla Íslands eru skattfrjálsir.

Neytendavernd

Happdrættisvélar Gullnámunnar eru einungis staðsettar þar sem börn og unglingar hafa ekki aðgengi. Þess vegna eru engar vélar frá Gullnámunni staðsettar í verslunum, söluturnum eða öðrum svæðum þar sem gera má ráð fyrir að börn og unglingar gangi um. Þeir aðilar sem gert hafa samninga við HHÍ um rekstur slíkra véla eiga það sameiginlegt að reka staði þar sem aldurstakmörk eru að lágmarki 18 ár, en iðulega 20 ár.

Gullnáman notar einungis happdrættisvélar og leiki frá viðurkenndum framleiðendum þar sem tryggt er að tilviljun ráði niðurstöðu leiks. Til að tryggja öryggi og hagsmuni notenda er einungis notaður búnaður sem staðist hefur úttekt hjá viðurkenndum óháðum úttektaraðilum. Búnaðurinn sem Gullnáman notar s.s. hugbúnaður og leikir stenst ávallt úttekt sérfræðinga áður en hann er tekinn í notkun. Um úttektirnar sér virt bandarískt fyrirtæki, Gaming Laboratories International Inc. Þetta fyrirtæki sérhæfir sig í úttektum á hug- og vélbúnaði til nota í happdrættisrekstri og er óháð framleiðendum og viðurkennt af íslenskum yfirvöldum.